منگلورو، 5 /نومبر (ایس او نیوز) آل انڈیا کانگریس کمیٹی (AICC) کی جانب سے شروع کی گئی ملک گیر عوامی تحریک 'ووٹ بچاؤ - دیش بچاؤ' کی ایک کڑی کے طور پر شہر کے  کلاک ٹاور کے قریب ڈسٹرکٹ کانگریس کمیٹی کی جانب سے ایک احتجاجی مظاہرہ منعقد کیا گیا ۔

احتجاجی مظاہرین سے خطاب کرتے ہوئے ڈسٹرکٹ کانگریس کمیٹی کے صدر پدم راج آر پجاری نے سوال کیا، "بی جے پی والو! آپ لوگ خود جمہوریت کو کمزور کرنے کی کوشش کر رہے ہیں ۔ اب آپ کس سے جمہوریت بچانے کے لیے کہہ رہے ہیں؟"

انہوں نے کہا کہ کانگریس ملک کے ہر شہری کے حقوق کے تحفظ کے لیے سڑکوں پر اترے گی ۔ انہوں نے کہا: "ہماری جدوجہد ہر گھر تک پہنچ چکی ہے، اور ہمارے بچے بھی اس سے واقف ہیں ۔ کانگریس جمہوریت کے تحفظ کے لیے پرعزم ہے ۔ اگر بی جے پی کو جمہوریت کا ذرا بھی احترام ہے، تو اسے فوری طور پر 'اسپیشل انٹینسیو ریویژن' (SIR) کو واپس لے لینا چاہیے ۔"

ووٹر فہرستوں کا حوالہ دیتے ہوئے پجاری نے کہا کہ ریکارڈ سے پتہ چلتا ہے کہ کرناٹک میں 99 لاکھ اور پورے ملک میں 13 کروڑ ووٹروں کو ڈرافٹ ووٹر فہرستوں سے خارج کر دیا گیا ہے ۔ انہوں نے بی جے پی کو چیلنج کیا کہ وہ اس بات کی تفصیلات فراہم کرے کہ ووٹر فہرستوں کی نظرثانی کے دوران بنگلہ دیش اور پاکستان سے تعلق رکھنے والے کتنے لوگوں کی نشاندہی کی گئی ہے ۔

انہوں نے کہا : "بی جے پی کی جانب سے رچی جانے والی سازش کو ہر گھر تک پہنچایا جانا چاہیے ۔ ہماری پارٹی غریبوں کے حقوق کے تحفظ کے لیے پرعزم ہے ۔ ہم ہر تعلقہ اور گاؤں کی سطح پر اپنی جدوجہد کو تیز کریں گے اور یہ پیغام ہر گھر تک پہنچائیں گے ۔"

اس موقع پر خطاب کرتے ہوئے میسکوم (MESCOM) کے چیئرمین ہریش کمار نے کہا کہ آئین نے ملک کے ہر بالغ شہری کو ووٹ دینے کا حق دیا ہے ۔ لیکن مرکزی حکومت غریب عوام اور بی جے پی کے مخالفین کو اس بنیادی حق سے محروم کرنے کی کوشش کر رہی ہے ۔

انہوں نے الزام لگایا کہ چیف الیکشن کمشنر گیانیش کمار مرکزی حکومت کے ساتھ ملی بھگت کر رہے ہیں اور ووٹ چوری کرنے میں سہولت فراہم کر رہے ہیں ۔ انہوں نے دعویٰ کیا کہ اس مبینہ سازش کے نتیجے میں ہی کچھ ریاستوں میں این ڈی اے (NDA) کی حکومتیں قائم ہوئی ہیں ۔

انہوں نے یہ بھی الزام لگایا کہ چونکہ کرناٹک میں دو سال بعد انتخابات ہونے والے ہیں، اس لئے ووٹ چوری کرنے کی کوشش کے تحت 'ایس آئی آر'  کے نام پر اہل ووٹروں کے نام فہرستوں سے نکالے جا رہے ہیں ۔

انہوں نے پارٹی کارکنوں پر زور دیا کہ وہ چوکس رہیں اور ہر پولنگ بوتھ پر ووٹر فہرستوں کی تصدیق کریں ۔ اسی کے ساتھ انہیں یہ دیکھنا چاہیے کہ کن لوگوں کے نام شامل یا خارج کیے گئے ہیں، اور ’فارم 6‘ جمع کروا کر اس بات کو یقینی بنانا چاہیے کہ اہل ووٹرز کا نام انتخابی فہرستوں میں درج ہو ۔

اس موقع پر کانگریس رہنما رماناتھ رائے، نوین ڈیسوزا، ممتا گٹی، ونے راج اور اپی موجود تھے۔