نئی دہلی ، 10/ نومبر (ایس او نیوز) انڈین ریلوے نے پارسل کی ترسیل کو آسان بنانے کے لیے گھر سے گھر تک ڈیلیوری کی نئی سہولت متعارف کرانے کی تیاری شروع کردی ہے۔ 'ریل پارسل ایپ – گھر سے گھر تک' (Rail Parcel App – Ghar Se Ghar Tak) کے ذریعے اب لوگوں کو پارسل بھیجنے کے لیے ریلوے اسٹیشن کے پارسل آفس جانے کی ضرورت نہیں ہوگی، بلکہ وہ اپنے گھر سے ہی پارسل کی بکنگ، وصولی اور منزل تک ڈیلیوری کا انتظام کرسکیں گے۔

ریلوے بورڈ کے منصوبے کے مطابق یہ سہولت ابتدائی طور پر ملک کے آٹھ بڑے شہروں دہلی، ممبئی، کولکاتا، چنئی، احمدآباد، حیدرآباد، بنگلورو اور پونے میں شروع کی جائے گی۔ اس کے لیے اینڈرائیڈ، آئی او ایس اور ویب پلیٹ فارم پر ایپ تیار کی جارہی ہے۔ تاہم، ملک گیر توسیع سے قبل تکنیکی آزمائش اور ضروری تیاریوں کا عمل مکمل کیا جائے گا۔

کس طرح کام کرے گی نئی سہولت؟:اس نظام کے تحت صارفین ایپ یا ویب سائٹ کے ذریعے پارسل بک کرسکیں گے اور اپنی سہولت کے مطابق گھر سے پارسل اٹھانے اور منزل پر گھر تک پہنچانے کی خدمات حاصل کرسکیں گے۔ ریلوے کے ساتھ کام کرنے والی نجی لاجسٹکس کمپنیاں پارسل کو بھیجنے والے کے گھر سے وصول کرکے متعلقہ ریلوے اسٹیشن تک پہنچائیں گی، جہاں سے ہندوستانی ریلوے اسے ٹرین کے ذریعے منزل کے شہر تک منتقل کرے گی۔ وہاں سے لاجسٹکس کمپنی پارسل وصول کنندہ کے گھر تک پہنچائے گی۔

صارفین کے پاس صرف ایک اسٹیشن سے دوسرے اسٹیشن تک پارسل بھیجنے یا مکمل گھر سے گھر تک ڈیلیوری حاصل کرنے کے دونوں متبادل ہوں گے۔ پارسل کی پیکنگ، ذخیرہ کرنے اور دیگر اضافی خدمات بھی ضرورت کے مطابق حاصل کی جاسکیں گی۔

15 دن پہلے بکنگ، آن لائن ادائیگی اور ٹریکنگ:نئی سہولت کے تحت صارفین ٹرین کی روانگی سے 15 دن پہلے تک پارسل بک کرسکیں گے، جبکہ بکنگ ٹرین کی روانگی سے کم از کم ایک دن پہلے کرنا ضروری ہوگا۔ پارسل کی جگہ ٹرین میں دستیاب گنجائش کے مطابق بکنگ قبول کی جائے گی۔

ادائیگی کے لیے یو پی آئی، ڈیبٹ اور کریڈٹ کارڈ، نیٹ بینکنگ سمیت ڈیجیٹل ذرائع استعمال کیے جاسکیں گے۔ صارفین ایک ہی ٹرانزیکشن کے ذریعے ریلوے کے کرایے اور لاجسٹکس کمپنی کی خدمات کی ادائیگی کرسکیں گے، تاہم دونوں کے چارجز الگ الگ دکھائے جائیں گے۔

پارسل کی بکنگ کے بعد صارفین کو ڈیجیٹل رسید اور ٹریکنگ کی سہولت فراہم کی جائے گی۔ پارسل ٹرین میں لوڈ ہونے، منزل پر پہنچنے اور ڈیلیوری کے مراحل سے متعلق اطلاعات موبائل پر موصول ہوں گی۔ پارسل وصول کرنے یا گھر پر ڈیلیوری کے وقت او ٹی پی کے ذریعے تصدیق بھی ضروری ہوگی۔

کرایہ اور رقم کی واپسی کے قواعد:پارسل کی نقل و حمل کا کرایہ ٹرین کی قسم، مسافت، وزن اور پارسل کے حجم کے مطابق طے ہوگا۔ گھر سے پارسل اٹھانے اور گھر تک پہنچانے کے لیے نجی کمپنیوں کی فیس الگ ہوگی، جس کی تفصیلات بکنگ کے وقت صارف کو دکھائی جائیں گی۔

اگر پارسل اٹھائے جانے سے پہلے بکنگ منسوخ کی جاتی ہے تو ریلوے کے کرایے میں سے 10 روپے کلرکیج چارج کاٹ کر باقی رقم واپس کی جائے گی۔ تاہم، گھر سے پارسل وصول کرنے اور منزل تک پہنچانے کی خدمات کے چارجز کی واپسی متعلقہ لاجسٹکس کمپنی کی پالیسی کے مطابق ہوگی۔ پارسل اٹھائے جانے کے بعد منسوخی کی اجازت نہیں ہوگی، سوائے مخصوص غیر معمولی حالات کے۔

کن اشیا کی ترسیل ممکن ہوگی؟:میڈیا رپورٹس کے مطابق اس سہولت کے تحت پھل، سبزیاں، الیکٹرانک سامان، فرنیچر، دو پہیہ گاڑیاں، مشینری، اوزار اور کھانے پینے کی اشیا سمیت مختلف اقسام کے پارسل بھیجے جاسکیں گے۔ تاہم خطرناک، دھماکہ خیز، آتش گیر اور قانوناً ممنوعہ اشیا کی ترسیل کی اجازت نہیں ہوگی۔

بنگلورو میں پہلے ہی آزمائشی منصوبہ جاری:قابل ذکر ہے کہ انڈین ریلوے اس سمت میں پہلے ہی ایک آزمائشی منصوبہ شروع کرچکی ہے۔ وزارت ریلوے کے مطابق جنوبی وسطی ریلوے نے 25 فروری 2026 کو ریل پارسل ایپ پر مبنی آزمائشی منصوبہ شروع کیا تھا، جس کے تحت حیدرآباد، وشاکھاپٹنم، وجئے واڑہ، گنٹور، راجمندری، بنگلورو اور چنئی کے 17 اسٹیشنوں پر گھر سے پارسل وصولی اور منزل تک ڈیلیوری کی خدمات فراہم کی جارہی ہیں۔ اس آزمائشی منصوبے میں نجی لاجسٹکس کمپنیوں کو بھی شامل کیا گیا ہے۔

ریلوے کا کہنا ہے کہ آزمائشی منصوبے کے تجربات کی بنیاد پر ایپ کو ملک بھر میں توسیع دینے کے بارے میں فیصلہ کیا جائے گا۔ اس نئی سہولت سے عام صارفین کے علاوہ چھوٹے تاجروں، آن لائن کاروبار کرنے والوں اور چھوٹی و درمیانی صنعتوں کو بھی فائدہ پہنچنے کی توقع ہے۔