نئی دہلی ، 7/مئی (ایس او نیوز /ایجنسی) کانگریس نے مغربی بنگال اور آسام سمیت متعدد ریاستوں میں بڑے پیمانے پر انتخابی عمل میں مبینہ ہیرا پھیری، اداروں پر قبضہ اور جمہوری نظام کو منظم طریقے سے تباہ کرنے پر بدھ کو بھارتیہ جنتا پارٹی پر زوردار حملہ کیا۔ یہاں ایک پریس کانفرنس سے خطاب کرتے ہوئے پارٹی کے لیڈر پون کھیڑا نے کہا کہ ووٹر لسٹ میں جان بوجھ کر ہیرا پھیری کی جا رہی ہے اور جمہوری اداروں نے حکمراں پارٹی کے لیے سازگار نتائج کے لیے سمجھوتہ کر لیا ہے۔ انہوں نے کہا کہ بھارتیہ جنتا پارٹی نے جمہوریت اور جمہوری عمل کی آخری رسومات بھی ادا کر دی ہیں۔

پون کھیڑا نے کہا کہ ’’بھارتیہ جنتا پارٹی کی ووٹ چور حکومت نے اب بڑی ڈھٹائی اور منظم طریقے سے آسام اور مغربی بنگال کے لوگوں کے مینڈیٹ کو ریموٹ کنٹرول انتخابی مشینری کے ذریعے تباہ کر دیا اور مؤثر طریقے سے ان اداروں کو ہائی جیک کیا جن کا مقصد آزادانہ اور منصفانہ انتخابات کو یقینی بنانا تھا۔‘‘ انہوں نے کہا کہ آج جو کچھ موجود ہے وہ اصل میں جمہوریت نہیں بلکہ ایک کھوکھلی جمہوریت ہے۔

پون کھیڑا نے زور دے کر کہا کہ مغربی بنگال میں نوے لاکھ سے ووٹروں کے ناموں کو خصوصی نظرثانی میں حذف کر دیا گیا تھا، جس میں ستائیس لاکھ شہریوں کو ان کے حق سے محروم کیا گیا۔ مغربی بنگال کا حوالہ دیتے ہوئے کھیڑا نے کہا کہ بھارتیہ جنتا پارٹی پر بڑے پیمانے پر مینڈیٹ کی چوری اور ووٹر لسٹ میں ہیرا پھیری کرکے سو سے زائد سیٹوں پر نتائج کو متاثر کرنے کے الزامات ہیں۔

انہوں نے کہا کہ حذف شدہ ووٹروں کی تعداد کم از کم پچاس حلقوں میں جیتنے والوں کے مارجن سے زیادہ ہے۔ انہوں نے امید ظاہر کی کہ سپریم کورٹ اس کا از خود نوٹس لے گی اور جن لوگوں کے نام حذف کیے گئے ہیں ان کا ووٹ کا حق بحال کرے گی، اور ان حلقوں میں دوبارہ پولنگ ہونی چاہیے۔

کانگریس لیڈر نے کہا کہ اپوزیشن اتحاد جمہوری بحران کے اس فیصلہ کن لمحے میں ممتا بنرجی کے ساتھ واضح طور پر کھڑا ہے۔ انڈیا الائنس اس بات کو تسلیم کرنے میں متحد ہے کہ بنگال میں جو کچھ ہوا ہے وہ انتخابی نتیجہ نہیں بلکہ جوڑ توڑ کے ذریعے مسلط کیا گیا ایک تیار کردہ فیصلہ ہے۔

کھیڑا نے آسام میں انتخابی بے ضابطگیوں کا بھی حوالہ دیتے ہوئے کہا کہ دونوں ریاستوں کے نتائج سے ظاہر ہوتا ہے کہ جمہوری عمل پر قبضہ کیا گیا ہے۔ کانگریس کے ترجمان نے کہا کہ کئی ریاستوں میں ووٹر لسٹ کی خصوصی نظرثانی میں کروڑوں ووٹروں کے نام حذف کیے گئے ہیں۔

الیکشن کمیشن آف انڈیا کا حوالہ دیتے ہوئے پون کھیڑا نے کہا کہ کمیشن کے کام کاج سے سمجھوتہ کیا گیا ہے اور وہ اس طرح کام کر رہا ہے جس سے اس عمل کو سہولت فراہم کی گئی ہے۔ انہوں نے کہا کہ یہ پیش رفت جمہوری مقابلے سے سیاسی کنٹرول کی انجینئرنگ کی طرف اشارہ کرتی ہے۔