چنئی، 10 مئی (ایس او نیوز): تملگا ویٹری کڑگم (ٹی وی کے) کے سربراہ سی جوزف وجے نے اتوار 10 مئی 2026 کو تمل ناڈو کے وزیرِ اعلیٰ کے طور پر حلف اٹھا لیا، جس کے ساتھ ہی ریاست میں تقریباً چھ دہائیوں سے جاری دو بڑی دراوڑی جماعتوں — دراوڑ منیترا کڑگم (ڈی ایم کے) اور آل انڈیا انا دراوڑ منیترا کڑگم (اے آئی اے ڈی ایم کے) — کی باری باری حکومتوں کا سلسلہ ختم ہوگیا۔
تمل ناڈو کے گورنر راجیندر وشوناتھ آرلیکر نے ہفتہ 9 مئی 2026 کو سی جوزف وجے کو وزیرِ اعلیٰ نامزد کیا تھا، جب انہوں نے 234 رکنی اسمبلی میں 120 منتخب ارکانِ اسمبلی کی حمایت حاصل کرلی۔
سی جوزف وجے نے اتوار کی صبح 10 بجے چنئی کے جواہر لعل نہرو اسٹیڈیم میں حلف لیا۔ ان کے ساتھ نو دیگر وزراء نے بھی حلف اٹھایا، جن میں جماعت کے کئی سینئر رہنما شامل ہیں۔ سی جوزف وجے کانگریس کے اشتراک سے مخلوط حکومت کی قیادت کریں گے۔
گورنر نے سی جوزف وجے کو یہ ہدایت بھی دی ہے کہ وہ 13 مئی تک یا اس سے پہلے اسمبلی میں اعتماد کا ووٹ حاصل کریں۔ گزشتہ چند دنوں سے جاری سیاسی بے یقینی ہفتہ کی شام اُس وقت ختم ہوگئی، جب ’’وی سی کے‘‘ اور انڈین یونین مسلم لیگ (آئی یو ایم ایل) نے اپنی حمایت کا اعلان کیا، جس کے بعد ’’ٹی وی کے‘‘ کی حمایت یافتہ تعداد 120 تک پہنچ گئی۔
بعد ازاں سی جوزف وجے نے چنئی میں واقع لوک بھون میں گورنر سے ملاقات کی اور کانگریس، کمیونسٹ پارٹی آف انڈیا، کمیونسٹ پارٹی آف انڈیا (مارکسی)، وی سی کے اور مسلم لیگ کی حمایت کے خطوط پیش کیے۔
پہلے ہی انتخاب میں وزیرِ اعلیٰ بننے والے وجے، تمل ناڈو کے دوسرے رہنما:
’’ٹی وی کے‘‘ کے بانی اور اداکار سی جوزف وجے 1967 کے بعد تمل ناڈو کے دوسرے ایسے رکنِ اسمبلی بن گئے ہیں، جو پہلی مرتبہ منتخب ہونے کے باوجود وزیرِ اعلیٰ کے منصب پر فائز ہوئے۔ وہ ریاست کے پہلے ایسے وزیرِ اعلیٰ بھی ہیں جن کا تعلق عیسائی برادری سے ہے۔
ستمبر 2001 میں او پنیرسیلوم نے پہلی مرتبہ رکنِ اسمبلی منتخب ہونے کے بعد وزیرِ اعلیٰ کے طور پر حلف لیا تھا، جب سپریم کورٹ نے جے للیتا کو ٹانسی اراضی معاملہ میں سزا کے باعث نااہلی کی بنیاد پر وزیرِ اعلیٰ کے عہدے سے ہٹا دیا تھا۔ او پنیرسیلوم، جو اب ’’ڈی ایم کے‘‘ کے رکنِ اسمبلی ہیں، اُس وقت ریاست کے وزیرِ مالیات تھے۔ اس سے قبل وہ بلدیہ کے صدر کے طور پر خدمات انجام دے چکے تھے۔
تاہم، سی جوزف وجے کے معاملے میں نمایاں فرق یہ ہے کہ انہوں نے اپنی پہلی ہی انتخابی مہم ’’ٹی وی کے‘‘ کے وزیرِ اعلیٰ امیدوار کے طور پر لڑی، جس جماعت کی بنیاد انہوں نے فروری 2024 میں رکھی تھی۔ جماعت کو مکمل طور پر اپنے کندھوں پر لے کر چلنے اور 17ویں اسمبلی میں سب سے بڑی واحد جماعت کے رہنما کے طور پر ابھرنے میں ان کا بنیادی کردار رہا۔